我用天然護膚品大概已經有一年啦。你問我點解會開始用？由於上一年出現人生第一次皮膚敏感。真係講都唔信，我發現我皮膚嘅至敏原因係原木材料。敏感嘅野，真係唔係咁啱接觸到都唔會知。如果唔係我做原木雕塑作品，可能我一世都唔知我對原木材料敏感。果時真係痕到爆炸，我個身出左好多紅色一塊二塊嘅野好似濕疹咁。又睇醫生又食藥又搽藥膏，用左大約半年先好返。所以我朋友就建議我不如轉用天然護膚產品，減少d刺激等我快d好返。
有機嘅天然香草自然療法，用d易明嘅説法，我會話好似中藥咁。不過，如果直接用中式嘅講法，難免你會覺得自己有d婆仔，所以會用比較西方d嘅講法, 如有機/天然/植物療法等字樣。
不過始終係天然嘅產品，自然有點草藥味。而我最鍾意用嘅摩洛哥堅果油，陣味就最大啊。
如果身邊有對氣味特別敏感的人，最尷尬嘅多數都係當男朋友貼近你時，突然話你有婆仔味囉。特別係搽左天然油係身上果陣，d衫有機會沾到d油，吸得多，久而久之有d油益味。所以我盡量會喺沖涼前搽油，等自己個身吸咗啲油先沖涼，而唔係沖完涼先搽。咁我d衫就唔會吸到d油啦。同埋，天然產品無防腐劑，如果係自己Diy的就最好1-2個月內好用完或掉左傳啦。
唔知你地覺得護膚最重要係邊樣？對於我來講，卸妝同洗面，係咁多樣嘢之中最重要嘅。就算我返到屋企幾攰幾眼瞓我都一定會係瞓覺前卸妝。就好似我阿媽日日都要掃地同洗碗一樣，怕一唔乾淨就引左的蛇蟲鼠蟻！更可況係你見人嘅面容，一樣係永遠都唔可以偷懶。
可能有啲朋友會話，我都無化妝使乜卸妝？但你唔知道你話無化妝嘅定義係咩？指無化 “行"妝？定無化眼妝唔畫眼線？無搽foundation? 但你幾點都會有搽防曬同碎粉掛？只要有搽呢d 唔會溶係水，只會停留係表層嘅野就一定要卸妝！
我由舊年開始到而家一直用DIY天然植物油卸妝，做法簡單，價錢仲係非常之平!所需要嘅時間都只係大概15-20分鐘就做好了。
開初試用時會好唔習慣。因為覺得非常之油膩，油淋淋嘅感覺。但係慢慢你就會愛上咗佢，因為佢會保護你嘅皮膚，令你覺得好濕潤。卸妝油嘅製作方法，之前我跟網上人哋嘅做法，但始終覺得麻麻地唔啱自己。但我而家已經研究左兩條啱我自己嘅特別配方。由於開左d植物油就要快d用完，所以我好多時整卸妝油都會整多少少送俾朋友。
至於洗面，我而家就用天然面皂。 因為我唔想被膚接觸任何合成成分嘅洗面產品剌激皮膚。盡量避免過度去除油脂，溶解角質。同時要留意佢嘅清潔能力，會唔會殘留左的污垢係皮膚上面？阻塞毛孔而生暗瘡同皮膚粗糙呢。
過兩日再講多d…
出年將會係夢幻少女粉紅粉藍嘅天下。我講唔出而家我係有幾咁開心，因為Pantone 剛剛先發佈完2016年度顏色, 我個心就已經飛左去2016啦！識我嘅朋友一定知我會出事，應該係話我會好大件事，一定會買好多同好多粉紅色野。因為2016呢兩隻色唔只係我嘅心頭好…仲係我嘅最愛💖分別係Rose Quartz 13-1520 同Serenity 15-3919
我已經等唔切啦！好想見到全世界都出呢兩個顏色嘅野，一片粉紅粉藍海。就算我到時成日粉紅粉藍都大把人陪我啦✌🏼️
參考資料 Pantone 官網 2016顏色
相信大家對有機產品呢個名一定唔會陌生。而家市面上有大量稱為有機/天然嘅護膚保養品。相信大家逛市集時，一定會見到大量造型可愛的天然手工皂同天然護膚品。
其實 “有機” 呢個名詞只是近十幾年才普及，但要用到有機呢個名就一定要用有機認證嘅產品，係嚴格嘅生態法種植的農作物及生產，植物成分中最少95%為有機成分，所有成分中最少95%為天然成分和10%為有機成分。並證明產品由種植到生產都無使用過人工化學品，例如化學農藥及肥料，並且無基因改造同使用納米技術先得架。所以一般都會用 “天然”呢個字混水摸魚，因為含有天然成分的就可以叫自己做 “天然” 啦，又無話要含有幾多%先得。
如果要有Ecocert 天然化妝品認證，比起 “有機”呢個字，只要植物成分中最少50%為有機成分， 所有成分中最少95%為天然成分和5%為有機成分就可以了。
而走灰色地帶用“自然派”，“無添加”等字眼，呢D產品所佔天然植物精華嘅元素係少得非常可憐，而且仲含有好多合成成分，"無添加" 都只係指無某d指定不能添加使用的成分，並非指無用任何合成成分哦，所以要小心留意下。
咁點先知道係咪有機呢？咁就留意一下產品有無可信嘅有機認證機構發出嘅證明。
其實香港有兩個有認證的組織一個係香港有機資源中心同埋香港有機之認證中心。你可以瀏覽香港政府嘅網頁了解多D。
如果你買嘅係海外嘅產品，咁你可以留意下有無以下比較有名嘅認證機構logo啦。
大家千其唔好被一D自創嘅有機Logo 而魚目混珠，錯誤以為係有機產品哦！例如：100% organic, Natural guarantee 等綠色icon.
而呢個係國際認可的「無動物實驗」logo，友善動物的logo而不是有機標章哦。只要有呢個logo即係代表化妝品並未使用動物實驗！
參考資料:
這是近5年的我，看上去我好像差不多沒有甚麼大改變。只係轉下左右分界。
其實並需要成日去改變你嘅髮型，隨着潮流而變化，只需要搵出適合你面型及年齡嘅就得㗎啦。你有無留意到好多明星、女藝人又或者時尚達人，佢哋都係一直同一個髮型嗎？髮型就正正話左俾人知你嘅個性同埋生活方式了。
我一直塭同一個髮型師剪髮，已經幫我剪了11年了，佢以前會成日幫我玩d新變化，有咩新嘅流行髮型，佢都會塭我試下，差唔多每三個月就會去一次。試下唔同嘅髮型 , 時長時短漂染唔同嘅顏色，有好大嘅變化。因為當時仲未找到適合自己的，而且也很年輕覺得好好玩，所以好大膽咁咩都會試下，我試過前面留2條好長的頭髮，後面反而剪到好短的男仔頭。
其實嗰時都係為咗搵出一個適合我自己的髮型。而家已經找對了，加上跳芭蕾舞要扎包包髮髻，我已經唔會再成日嚟一個大改變了。因為我而家好滿意呢個令我靚d嘅髮型。而且呢個髮型又成為我的trademark 。我諗我呢個髮型已經維持咗大概八九年。
我依家只係偶爾會調教下長度，同埋轉顏色又或者係改變一下卷曲嘅大細。這就日我十年如一的方法。
“Funny Face"(1957 )係由我最喜歡的永遠優雅icon Andury hepburn 主演。其中有一段令我印象非常深刻。就係呢段：
http://youtu.be/VFK15t1QhjU
記得呢部電影我係喺大學圖書館等我housemate放學時睇的，果時放學最鍾意留係圖書館睇書同舊電影，因為有最多嘅免費資源。
我承認我係pink girl，唔知由幾時開始我慢慢收集左一大堆淺粉紅色同白色的東東。毫無理由，只係覺得呢d東東令我好開心。當你發現到自己嘅喜好，不妨試試將呢d元素變成你自己嘅style，而我嘅Style 就係咁漸漸形成。當然無可能好似部電影咁同時all pink， 但最少你可以放一兩件喺身。 就好似一d令你開心的魔法，不用在意別人的眼光。我相信美係由心而發，必需出自內心的，好的style 來自你對自己嘅態度。Diana Vreeland 曾經講過
“There’s only one very good life and that’s the life you know you want and you make it yourself." Diana Vreeland
我喜歡看自傳及記錄 ，喜歡的包括Coco Chanel，Diana Vreeland，那全部都是 inspiration，有興趣可以睇下她們的documentary。"The Eye Has To Travel （2011）", 是關於Diana Vreeland， 上YouTube 找找可以找到更多。
先看看trailor ：
你找到你的style嗎？
皮膚保養過度反而有機會變差，呢d叫做虛不受保。情況就好似你食得太飽飽得滯作嘔咁，咩都唔想吸收啦。
所以我每個星期都會有連續兩晚俾佢抖抖，只係會好簡單咁，用天然卸妝油卸妝等d油可以深入低層去除油脂，5鐘後用浸過暖水嘅毛巾印走，之後再用天然洗面皂輕輕咁洗走面層嘅油脂。咁就已經洗得好乾淨啦。
然後呢，就只係會搽摩洛哥堅果油，過15分鐘吸收囇唔笠果陣就可以瞓架啦。就係咁簡單💕想偷懶嘅，而家係咪好開心呢？
你會慢慢發現自己嘅素顏都可以見得吓人吖。上圖只係有基本skincare 同護唇膏
因為我個人比較無記性，我連自己幾時食藥都會唔記得時間，所以我就為自己定下左一個皮膚保養時間表，跟著個timetable 就一定唔會唔記得啦！而且仲可以慢慢變成習慣。
✨各位有興趣不妨試下✨
之前講咗咁多點樣分辨SPF同埋PA嘅數值，咁今次就同大家講下我最近用過嘅防曬產品。(我自己比較鍾意清爽無油光的產品。)
由於我本身係中性嘅皮膚只係T字位喺下午先出比較多油，以下嘅選擇比較適合中性皮膚參考，因為唔同嘅皮膚有唔同嘅需要要注意哦。之後我會每一個牌子寫一篇文章，同大家分析佢地嘅成分，再根據唔同皮膚嘅需要比d意見。
先唔理佢嘅成分，只係用舒適度，持久性，方便，遮瑕，保濕，易推，美白，調色，油光，價錢做評分。
上圖由上至下左至右排好No.1 -No.6，就係我的選擇次序，有♥的最係我的最愛CDP
以下就列出我最喜愛嘅各項Number One♥ 由我的Last choice 講起。
調色/ 包裝No.1
Chanel Le Blanc Light Revealing Whitening Makeup Base #10 Rosee, SPF 35, PA+++ HKD 410
感覺比較厚身，似似地foundation，可能想你一支就攪掂。一如所有Chanel的skincare, 佢一樣帶有一種清新花香，淡淡嘅花香味令你覺得好舒服同優雅。好容易推開，基本上都係為左令你好水潤，但感覺有D油膩，遮瑕力只係比foundation次一級，調色效果不錯，#10號有一種好淺嘅玫瑰花粉色，有美白效果。這個系列一共有4種不同的顏色，要睇你想點修飾膚色再選擇吧:
不過就覺得佢嘅質地唔係好好，好似有層野浮係皮膚上面，十分鐘後都吸收唔到落去。而且之後上碎粉感覺好浮面，又似加左一層野咁。雖然佢話控油，但我過左2﹣3個鐘後已經滿面油光，感覺唔夠滋潤欠缺水分。
包裝無得輸，孖C一出，無人可抗拒。雖然我係Chanel忠實fans，但呢個不會是我的選擇，我覺得年輕皮膚質素仲好好的美女OL都仲可以試試，因為調色效果真係唔錯，好方便。
最平No.1
Kiss Me: Heraine Beauty Perfect Water Sunscreen (SPF50, PA+++), HKD 69
呢個都係比較平的開架選擇。同Sofina一樣厚身D。堅係似搽緊太陽油咁，但又感覺有啲似透明嘅粉底，有微微嘅調色嘅效果， 咪又係令你睇落去白D。所謂一白遮三醜，明哂。但我去短線旅行會用佢，因為唔見左都唔會傷心，勝在夠平。而且防哂時間夠長，去旅行當然都唔想令盒粉底行行下街要補妝。好彩暫時去旅行仲未去過比香港更潮濕的地方。
舒適度/ 保濕度 No.1:
Clarins UV plus hp SPF 40, PA+++, HKD 370
比較多水份，感覺好有水潤感。可以見到D Liquid流來流去。色澤透明且無遮瑕作用! 頭五分鐘之內，仲會見到隻手好似好有油光，等6鐘左右就完全吸收變得乾爽有裸妝感，面部好似上左層薄霧的啞色，控油效果都不錯。防曬功夫做得幾好。
遮瑕/控油No.1
Sofina Primavista Ange，SPF25,PA++, TWD 350 (只在台灣發售，有朋友去開台灣不妨買支，大約HKD 90,好抵用😍)
勝在夠平少少。比較厚身，你會見到佢好有黏力。因為比較厚身嘅關係，美白能力同遮瑕都做得唔錯。一陣就已吸收哂，無油光又爽身，比較粉身搽上面後會變成粉狀， 有少少嘅粉紅色可調整膚色令你望落白左。如果本身皮膚條件唔錯，可以直接上粉餅&碎粉，唔駛用liquid foundation 都得。控油效果幾好，可以keep到一日，係平價之選，而且各方面表現平均。我已經用左兩支啦。
滋潤肌膚/ 防曬No.1
Sulwhasoo hydro-aid moisturizing lifting UV, SPF 50, PA+++, HKD 390 ( 韓國買會平好多哦)
雪花秀嘅防曬，感覺就好似搽緊面霜一樣，基本上唔會好似上文嗰幾隻咁，會好水咁流落去，反而會停咗你個手到好似cream 咁靜止。正如頭先所講，佢感覺好似面霜一般樣，所以搽咗之後你會覺得好潤，同好有光澤 （可能韓國美女都鍾意珠光效果吧）。雖然過咗五分鐘之後你塊面都仲係令笠笠，但你會感覺到吸收左。透明無色並無調色效果， 仲有好大陣中藥味。
♥美白/修毛孔No.1♥
Cle De Peau Voile blanc brightening Enhancer base, SPF 35, PA++ HKD 550 (最近韓won大跌，係樂天市場買居然係最平USD 58, 大約HKD370 @Nov2015 rate)
Shisedo其下之一，係人都知Shisedo嘅防曬好出名，一直都非常出色。呢個更加係係其下貴婦line，雖然係我嘅最愛但太貴了(我已用左3支)，所以我一直想塭吓一啲平價嘅代替品。暫時用Sofina代替。
無論係美白，調色，保濕各方面都表現得非常之好。佢好似一粒珍珠嘅顏色，搽上面之後好快就吸收完變成粉狀。但同時有一啲珠光嘅立體感。我好多時趕時間都係直接用完就加粉餅出門。
不過呢D都係未睇成分而單純以感覺行先的分析，下次我地再深入討論一下成分，可能選擇又會變了。
♦ 暫時寫住咁多先，有新產品會不斷更新 ♦
暫時寫住咁多，會不斷更新
Organic Roasted Dandelion Root Tea (Naturally Caffeine Free Herbal Tea)
因為呢個星期瞓得唔係咁好，加上轉天氣，作感冒，所以下午Tea time☕️沖左一杯蒲公英茶。雖然有一種強烈的苦澀味，所謂苦口良藥，好過飲咖啡啦。佢有豐富的維生素A和C、胡蘿蔔素、蛋白質、脂肪及礦物質同時含有豐富的微量元素，鈣、鐵等多種健康營養的成分。
蒲公英茶可以刺激口水分泌改善消化系統，仲可以幫助穩定血糖，防止過高/過低、強健肝臟、利尿、改善便秘、青春痘、清熱毒等功效。不過最緊要就係佢可以利尿，幫你去水腫，自然體重都減輕d。而且仲有抗癌作用，對病毒性流行性感冒仲有一定的治療作用。
蒲公英茶始終有啲藥性，所以大家切記唔可以飲太多而且唔可以過量。平時飲用蒲公英茶最好對症用藥，唔可以當成保健品來長期飲用。另外，蒲公英茶會降低血壓，所以不適合低血壓的人飲用。
因為有可能導致噁心嘔吐、腹部不適等不良反應。為左中和一下蒲公英茶的藥效，我特別加左少少蜜糖。
注意：陽虛外寒、脾胃虛弱者、對花草敏感也不宜飲用。
要留意自己是否對蒲公英敏感哦♥
右下角菱型格仔紋的就是早前係網上購買的防盜錢包，由法國空運到香港都只係用左1星期。外型十足我最愛的chanel經典格仔，而且一樣係Made and design from France。我塭左呢啲咁細個可以放喺我常用的Furla小手袋裡面嘅靚靚銀包好耐了。外面係用aluminum做, 耐用性高，仲防水添。
至於點樣防盜？咪就係防止喺街被人hack 同scan你張credit card囉, (pay wave拍卡偷竊), 即RFID safe。而家太多高科技，隨時行過拍吓你個銀包已經偷左你錢，唔駛拉你去後巷老笠咁麻煩。
RFID 即係無線通訊技術，可以通過無線電訊號識別特定目標並讀寫相關數據。就好似平時你用嘅八達通同信用卡pay wave 。詳細資料可以click入 Wikipedia
由於呢個銀包嘅查詢度超高，所以特別整左呢條片，等大家可以睇下呢個銀包系點樣樣嘅。
搜尋關鍵字: RFID wallet
SweetheartGal | Beauty | Calligraphy 
你必須登入才能發表留言。