Fashion & Lifestyle – SweetheartGal | Beauty

♥ MrsC9 to be ♥ 一見即心心眼的靚靚絲花球

Published on 6 六月, 201719 六月, 2017 由SweetheartGal撰寫

相信每位準新娘一定有好多野煩，有無辦法一次過俾晒d好野我？等我條B2B路好行d🙏🏻 影Pre wedding又要煩惱搵個花球襯下。但要搵一個靚的花球真係唔易，由於影pre wedding 要上天下海，真花可能影半日就bye bye 了，為左慳家，我決定用絲花球影，咁就成日咁玩都唔擔心玩殘個花球啦。一般巿面上的絲花球款式差不多，顏色來來去去都係大路的粉紅同米白色，除非訂做唔係一定無d特別野。雖然我已經自己DIY左個dream花球，但女孩子總係三心二意，特別係做左B2B，總係想搵到最靚的東東。就係呢個時候我的BFF 出現，佢本身係專門做保鮮花盆景設計，但一聽到我話要花球，就話我知其實佢有好多日本靚絲花做的花球。佢whatsapp 左d相俾我，問我想要邊個，天呀，唔係買花讚花香，d日本絲花真係好真好靚好靚好靚❤️

呢幾張就係佢Whatsapp 比我的，係咪好心心眼？

我無諗咁多就話全部丫唔該，點知佢又堅陪我玩，轉個頭就搵速遞送左8個花球去我屋企。

其他friend 子聽到就笑我，話我到底會影幾多輯prewedding ？定係我想張張相都拎幾個花球？🙈

實物係咪好靚呢？

我諗大部分女仔同我一樣見到咁多花一定好心心眼。佢咩色都有，估唔到酒紅色同藍色花球真身係咁靚，如果唔係佢俾我，我真係未必冒險買太特別的紅同藍的花，因為好多時幻想同真實好唔同。但想講粉藍色原來都好fresh 好靚架，如果我去外拍影草地應該好靚。雖然我本身係粉紅痴，長期以為至愛的粉紅色先最襯，原來藍色襯我d膚色仲靚呀！我影完PW 再俾大家睇下啦。

而家突然有咁多花球，我可以諗下邊件衫襯咩花球，好期待我星期五去影prewedding 呀，不過果日好似勁熱，仲要拎好多野，希望我唔好熱到溶左啦。

如果大家有興趣可到

Facebook / Instagram Greeninhk 找佢啦

♥ MrsC9 to be ♥ 遇上超好人的婚紗店店長

Published on 18 五月, 201719 六月, 2017 由SweetheartGal撰寫

自從男友4月去旅行時神秘求婚之後，返到香港我地就好快手開始籌備婚禮。除左因爲啱啱遇到婚展而join左PW plan 之外，我就真係場地日子都未confirm 就已經去睇婚紗啦，無辦法啦，女仔對婚紗係有情意結♥

Join 左wow esdlife 同學會之後我真係好努力每日睇文，好似上左引咁，一有時間就開apps 睇。見到大家都咁開心share 真心覺得大家好好，同時亦感覺到大家的幸福心情。

睇左大家分享左咁多試婚紗嘅相，又俾我問左一大堆資料之後。上個星期我終於開始第一次試婚紗。我去左位於觀塘大家近期的話題婚紗店。地點非常就腳，觀塘B出口行過觀塘廣場，第一個街口轉左直行差不多到街尾。不過要小心，因爲隔離棟樓個名同佢差不多，我唔小心行錯左，上到去一出lift個刻，心諗真係好舊式嘅工業大廈喎，有d唔對路。發現行錯左之後，就快快腳去返啱個地址。今次上到好即係好唔同，lift 口都光猛d。行到去門口，我簡直好似去左酒店spa咁，全白色設計的裝修，細心的放左一張凳o係門口俾你換拖鞋，拖鞋上面仲有佢個logo 架。不過如果你無乜所謂都可以唔著，因為我試試下衫就已經唔會記得著返。成個店鋪的裝修都係用全白色公主房設計，感覺grand 得黎好舒服，我見到就超級心心眼了。

係度真係讚下100分的店長，勁細心勁好人超nice💕 除左唔怕我煩由得我任試，係咁細心幫我著好件婚紗(你地都知背後個綁帶真係有排穿架) 🙈仲要有幾件我一上身就知唔啱我，佢都話試埋啦，起碼你之後會知咩衫型可以唔駛再試，幾靚都唔適合你。果刻我真係好感動，佢真係好好人😘
其實去之前我都去左佢Facebook 睇定d款，都幾清楚自己要乜，就係甜美優雅大拖尾Style ，所以都可以好快手決定試咩。不過原來咁樣又除又著，都用左成個半鐘，我真係非常唔好意思阻左佢收工🙏🏻真係辛苦左店長。其實心目中都已經有The ONE嘅人選，如果我無再試到其他啱可能就係佢。不過今次就唔post 先，因為我想保持神秘感，跟西方傳統，婚禮當日先俾未來老公睇到The One，咁先有First Look feel 嘛。等佢結婚嗰日有驚喜。

呢間婚紗舖嘅婚紗非常注重cutting，入邊有好多魚骨。所以店長建議我著nu bar就得，連girdle都可以唔使著啊。真係着咗無胸都變有胸，無腰到變有腰。好啦，俾大家睇下我試成點啦。不過都係唔入選的朋友

第一件係魚尾，其實着得好靚又令我好似高左。同時顯得優雅高貴左好多，個拖尾超靚呀。不過我未有叮一聲的感覺

第二件都係魚尾，係店長推介。不過我感覺上身太多閃石，好似感覺有啲太貴婦了。唔太襯我

第三件都係魚尾，因為我好鍾意個充滿仙氣的背後design

第四件就公主款。但我人矮，所以齊地puff 款即刻唔掂，變咗個波，即out 試完婚紗到晚裝，呢條紅色敬酒禮服，質料超輕，布料輕飄飄，好有仙氣。我地拉起左裙尾之後要用成一分鐘先飄返落地下😂

粉紅色係所有女仔嘅情意結，著上身即時少女左❤️

後補資料：

只要上到去show facebook like 就可以免費試身一小時。不過我唔小心超時，佢又未收工就由得我。十萬個Thank you。而且店長完全無hard sell我，俾我返去慢慢考慮，仲提我今個月有promotion, 去到5月尾前落單有9折。唔需要咩即試即落單先有折。之後仲可以無限轉款。

Shop info:

Ma Cherie Bridal HK
觀塘成業街19-21號成業工業大廈13樓17室
Tel: 3791 2183
Facebook@macheriebridalhk

Facebook @sweetheartgal
Instagram @sweetheartgal

Love ❤️ 花魁回憶錄

Published on 20 十一月, 201620 十一月, 2016 由SweetheartGal撰寫

今次來京都另一目的就係要試下影花魁相，本著趁年輕仲有少少本錢影，過多幾年應該就未必會啦。上網搵左幾間，左睇右睇就選左心•花雫呢間。我見佢地IG post 嘅相好靚，衫同場景都係我想要的，價錢都合理，網上評語都好好。我走個陣仲有幾個員工平排送我出門，感覺賓致如歸。

位置超近地鐵站，坐京阪本線係衹園四条站1號出口，一出地面右手邊沿著小路行1分鐘就見到架啦。

(圖片來自佢地個web site)

我選左花魁体験　牡丹plan 14000 yen+tax.，華booth，我加左10張相嘅CD要3000円，一共18360円連税。

大家其實唔需要擔心溝通嘅問題，因為去到佢哋會有人問你講日文定係英文，如果講英文嘅話，會有講英文嘅同事服侍你。
過程真係好快，一去到就會叫我填份表，寫下你的基本資料，如名字、聯絡方法同埋問你有無coupon啦 (我去到先知TripAdvisor 有coupon 架，大家可以望望)，仲有邊度知道佢哋公司。填好之後佢哋就會帶你上2樓準備化妝㗎啦。

因為無得影相，所以畫個簡單floor plan 俾你地望。

一到2樓會有同事話俾你知各個房間嘅位置，然後你會先帶去更衣室。嗰度會有locker放低你嘅私人財物，另外會俾一個籃你放手提電話或者相機，因為之後你會有時間自己自拍架❤️

跟住佢會比一件紅色近似嘅圍巾嘅衫俾你著，然後指示你除咗你D左面衫，剩下啲底衫褲。有一個小建議，最好就著無bar帶嘅bar bar，因為之後你會有機會露肩影相，著無帶會方便d架。換好衫之後，就可以自己行去返化妝間嗰度準備化妝set頭啦。

化妝過程超簡單，會有D相俾你揀效果。基本上就得兩個選擇，如果你想轉其他嘅妝就可能要加附加費啦。兩個基本妝，化妝小姐話睇你想點表現，如果選紅色嘅就比較可愛，紫色嘅就比較sexy。最後我選左紅色。因為我想襯返我之後想揀嘅紅色衫。如果你無油指甲去佢都有幫你整指甲嘅服務㗎。

髮型選擇都係得兩個嘅，如果想整其他款式都係需要附加費。咁我之前上佢地ig睇過，基本個款已經係我想要的，而且之後佢會插到你成頭都係花，所以都無乜所謂了，最緊要靚。期間我都有問佢哋意見佢哋都會同我分析，話俾我知邊一個襯我多啲，唔會話hea你。整個過程我用兩三分鐘就揀咗自己想要㗎啦，超快。跟住就一個化妝師，一個髮型師兩個起勢係咁幫我整，轉一眼就已經幫我set好個頭同個妝啦。因為過程實在太快啦，我都唔記得問佢可唔可以影一兩張相添。我唔係好記得時間，大概用左半個鐘左右。
之後就輪到揀衫，首先你要揀一件外襯，佢拎咗一疊相俾我叫我揀外面最華麗嘅和服，嗰件係最主要影相架，所以我好小心揀因為好驚揀錯啊。花多眼亂有好多款揀，雖然心裡便已經諗住要紅色嘅，但係都係心思思睇咗好多見啊。建議上佢地Instagram 睇左先。
之後到內襯嘅和服。因為我已經睇ig 選左想要邊件，所以我直接攞張相話俾佢聽就得。着和服嘅時候佢會問你要唔要性感d露肩，咁佢就會將你個領口拉開少少。著好之後之後佢又會好快手拎左兩條和服嘅腰帶俾我揀，佢拎咗一條藍一條紅色嘅俾我揀，同佢商量之後決定用紅色嘅，跟住有另一個煩惱，就係要揀條絲巾係最外面，同樣佢拎咗幾條俾我揀，為左唔想太粉紅色，我聽佢意見決定用黃色，原來出來嘅效果真係不錯，好彩聽佢講。咁樣揀揀下就攪左幾個字。

剛化好妝，我好快手影左張相

整好晒之後你就會被帶到走廊度等攝影師。基本上就唔需要等，行到過去攝影師就已經準備好叫你入房影相，入到去你就開始你嘅夢幻過程了。整個過程私隱度極高，唔會擔心自己影相會有其他人望住。大可放心擺甫士。
影相嘅時候攝影師哥哥會同你有少少身體接觸，佢哋係專業嘅，你並不會覺得係抽水，只不過係想你有一個更好嘅甫士，絕對可以放心。
我堅唔係model🙈，影個陣我只感覺到自己係件貨，任人舞。整個過程式就係太夢幻啦，我完全唔知發生緊咩事，攝影師講乜我就做咩pose，勁聽話，但我有d緊張，好多張相都笑得好怪，所以唔係張都好睇。不過無所謂啦，因為成個過程真係好開心好enjoy❤️❤️❤️

當攝影師哥哥同你影完相之後，佢會話俾你聽之後係你嘅自由時間，你可以係走廊度隨便自拍任影㗎啦。我當然放過呢一個機會係走廊到瘋狂係咁影相。不過因為張張都係自拍，所以影咗一陣我又覺得好無聊，好似張張差不多，所以無影太多了，就決定返返去化妝間度卸妝完成左呢個旅程。化妝間有一啲簡單的護膚同卸妝用品俾你卸走呢個咁浮誇嘅妝。但係並無提供化妝品，所以如果你要化個靚妝走人就記得要帶自己嘅化妝品啊。

係你卸妝之前，佢會提你落去樓下一樓首先揀咗要print out 嘅相，咁你就可以係等printing 嘅過程去化妝啦，咁就不會呆等。

我個package就包左五張print out相同埋十張名片，如果你想要番你啲相嘅file就可以加1500円要五個files或者3000円十個files或者系5000円全部相嘅files。

唔知係咪我化妝化得快返來之後仲未印好反而印左我一張相叫我寫D留言比佢哋。仲帶咗我覺得間房度慢慢寫，沖左杯綠茶同俾我等我係房度慢慢休息等邊相印好同埋寫留言。不過過咗陣就搞掂咗啦。

以下就係我其中幾張相，我覺得唔似自己。

成個過程大約2.5小時，連化妝，set頭，著衫大約半個多小時，我感覺好快。影相就半小時左右，再加自拍時間同等曬相。如果大家有機會去京都不妨係呢度試下玩下。
http://www.maiko-maiko.com

Love ❤️清除體內垃圾

Published on 10 八月, 201611 八月, 2016 由SweetheartGal撰寫

我一直都係腸胃不好的人，除左個玻璃肚之外，仲有一個問題就係便便不暢通。對於便便暢通嘅你哋，係無可能會明白坐係洗手間到幾個字都無辦法出來嗰種辛苦。可能係工作忙碌同有壓力的關係，二至三天沒有排便對我來說都是很正常的。所以成日肚凸凸，脹脹咁，好似有左3個月咁，便便都有幾磅重。但導致我體內儲存太多毒素，你都咪話唔辛苦。如果身體堆積過多的毒素，你就會留意到自己d皮膚變差，生暗瘡，嚴重嘅可能因為便秘而造成血液污穢，久而久之被細菌留咗係腸入面塞住哂，仲可能引發其他病出來，例如會生息肉更差嘅甚至生癌。
自問每日飲水都多，一定有八杯，用餐習慣不能話太差，蔬菜一定夠吧，我每日下午都會沙津，所以纖維一定多。最唔好都係我晚餐多數出街食，比較多油吧。
為左改善，我有時星期六唔駛返工的話，會一起身空肚飲一杯加左一茶匙粗鹽的䁔水，之後大約一個鐘內你會感覺到個肚係咁攪，勁有便意時就要跑去廁所去清啦，大約去3-4次到就清架啦。去清之後你會覺得成個人鬆哂。但係有個唔好處，就係鹽水太鹹好難入口，飲完都唔係好舒服，因為飲完必會去幾次洗手間咩都唔好做，齋等所以只好放假可以進行。可以的話我都唔係咁想成日飲。
另外，飲用天然蘆薈汁都好得架，幾好飲。成效無鹽水咁勁，當想去洗手間時有少少便意，清到下腸胃。不過有少少糖份，而且唔係度度有得賣，成本$18 支，我通常都係路過先買，當係健康飲品，好過便利店的問題d果汁啦。

除左以上方法，下面係最近一個月嘅心得:
聽好友介紹過話可以灌腸清除體內垃圾，但係呢我有啲擔心，佢就介紹咗隻比較溫和嘅方法俾我試左先。就係推介左我試iherb就可以買到嘅nature’s secret super cleanse 呢隻洗腸藥，佢呢個療程就食一個月(不能多過)，頭三日我早晚各食一粒觀察自己接唔接受到，之後我就嘗試早晚各二粒，食左兩個星期之後就加份量到最高嘅用藥量早晚各三粒，千祈唔好超過一日六粒啊。一直keep 住早晚食一個月。
首先講講， Super Cleanse 係一種腸道清潔的補充劑，聲稱可以刺激和清潔結腸。含有鈣，鼠李皮 (協助排泄系統的排泄)，茴香，甘草，生薑，角叉菜，滑榆樹(可帮助缓和消化不良，能提供粘液以舒缓消化道。)，伏牛花，紅樹莓和其他一些成分的專利配方。就咁睇落啲成品都好似好天然，加上係iherb 賣嘅我就信佢試下啦。
講下我嘅身體變化啦。頭果三日啱啱食嘅時候，會覺得比較口渴，想飲多啲水，咁係正常嘅，之後習慣咗呢就已經同平時一樣飲咁多水啦。但就唔會好似食d減肥藥咁樣，心跳緊張呀，各樣各樣呀，我就唔覺得有啲咩其他變化。好彩我無side effect。頭果幾日D便便會比較臭嘅，因為排緊自己的毒素出來呀嘛。而且頭個幾日d便便都係有d硬，仲未暢通，始終塞咗係身體裡面咁耐。之後幾日會慢慢感覺到便便越來越軟身，而且慢慢你就會習慣咗每日有段時間會有便意。食咗藥嘅呢一個月來，我每日都可以去到一次甚至兩次，我覺得成個人好輕好舒服。停咗藥大約已經一個星期，都仍然keep住呢個習慣每日同一個時間左右就會有便意，簡直係太好啦！不過剛完成一個月嘅療程，暫時唔能夠再食住，不過如果之後有一日無便便一定會再食呢。

Love ❤️ 斷割離，慳錢有計仔🎀 美容篇 I

Published on 26 七月, 201626 七月, 2016 由SweetheartGal撰寫

其實好難要自己完全唔去買D靚靚嘅化妝品。特別係嗰啲包裝精美你一睇到就變😍bling bling 眼果d。你一行去櫃台度就極易中招，好似中咗毒咁唔買唔得，仲會忐忑不安心神恍惚，不斷係櫃台賴死唔走，係心裡面搵1個理由去買，試試下就心思思買左㗎啦。而我自己就係呢啲毫無抵抗力人，所以就經常買咗一大堆。但而家已掌握一d斷割離的心思，所以變得好決斷有咩係需要有咩係可以改用其他的。

上回講到我點樣用斷割離大法慳錢，今次又講講我斷割左咩美容產品同改用d咩啦。
首先介紹一下可以去 iherb.com 講買的東東。大家有無聽過iherb 呢？我都介紹左俾身邊好多朋友去買架啦。其實係美國大型網上藥妝店，我大部份的美容產品都係係呢度買架，而且買滿$40美金仲可以免運費直接送來香港添喎。

改用番梘而唔用沐浴露

呢個係最容易改嘅。大家都有聽過沐浴露對皮膚唔係咁好架啦，我就唔係度講先。之前我都有同大家講過我因為一次皮膚敏感而從始改用番梘。可能仲係有d人覺得沐浴露乾淨d又潤d，其實暗藏好多化學成份對皮膚唔係咁好架。你有無諗過改用番梘可以慳好多$？假設用Dove 沐浴露750g一支惠康價$38.9 ，用大約2-3個月左右。但一舊梘只係USD2.30 (大約HKD17.83) 可以用5-6個月。

我最近用Olivella, Face & Body Bar, 可以同時洗面又可以沖涼。不過特別要注意，就係洗面嘅時候，我一定會起泡起得超多，用泡泡慢慢係塊面上推慢慢洗乾淨，切忌心急大力擦。
洗面乳我之前用過不同的韓牌，以innisfree有機橄欖深層保濕泡沫洗面乳150ml$79計
以一舊梘壽命長沐浴露同洗面乳一半時間。

咁就慳左$217.17

日日用好似飄雪咁飄走的碎粉

一直鍾情Les Merveilleuses Ladurée 的古典蕾絲蜜粉$1180，而Cle De Peau 就算只買refill 都要$700。每次用都覺得d錢好似d粉咁飄走😅 除咗因為佢哋蜜粉真係好好用，好幼滑之外，亦都有小小私心😳 絕對係因為佢哋個粉盒外表真係好靚。如果唔係咁，我無需要一定用佢。既然咁貴我唯有留返個粉盒買其他嘢來代替啦。

卒之俾我搵到呢一隻E.L.F. Cosmetics, High Definition Powder, Sheer 只係USD 6( 大約 HKD$46.5) 佢原裝個盒好細，唔易拎粉，所以倒落之前個粉盒，即時變得好易用粉撲掃到d粉，而且又可以用自己鍾意的粉盒啦。

慳 $1133.5

自製卸妝油

其實堅唔駛街買，因為卸妝又唔係要護膚，清潔到就得，反正一陣就會沖走。之前都有另一個post講過我自己整卸妝油。如果自己整卸妝油大概材料係呢個價錢:
Now Foods, Solutions, Certified Organic, Jojoba Oil, 4 fl oz (118 ml)

USD9.93 大約HKD77

Aura Cacia, Natural Skin Care Oil, Harmonizing Grapeseed, 4 fl oz (118 ml)

USD3.6 大約HKD27.2
Aura Cacia, Natural Skin Care Oil, with Vitamin E, Nurturing Sweet Almond, 4 fl oz (118 ml)

USD4.27 大約HKD33.1
Aura Cacia, Organic, Skin Care, Castor Oil, 4 fl oz (118 ml)

USD 3.95 大約HKD30.6
Optional:

Aura Cacia, 100% Pure Essential Oil, Sweet Orange, .5 fl oz (15 ml)

USD 4.14 大約HKD32.1
成本HKD $200, (472ml) , 我每次整50ml 左右已用2-3個月，即$21.2 用2個月。我仲成日整來送俾朋友用添。
如果同之前用過的Etude house眼唇卸妝水就$68
慳$46.8
如果想知道點樣整可以睇返呢個post

https://sweetheartgal.com/2016/01/06/甜姐兒教室-diy-卸妝油/

面部防曬用品
我對防曬用品有一種莫名其妙的執着，一定一定一定要乾爽同貼面，之前一直心宜Cle De Peau base $550 同 Clarins ，但係好貴啊，我平均2-3個月用完一支，就Clarin 一支就索價$520, 而家改用Sofina( Primavista Ange) Long Keep Base，台灣Watson 價，大約HKD $89

慳$431
呢度就一共慳左 $1828.47 👍🏼

❤️❤️❤️
下回再分享多啲

Love ❤️ 斷割離，慳錢有計仔

Published on 24 七月, 201624 七月, 2016 由SweetheartGal撰寫

斷割離真係幫到我，淘寶都少左。今個月無買衫同化妝品咭數大約減一半。(別問我平常是多少😛)
今個月正係減價月我竟然無買到啲咩多餘野啊，自我感覺良好呢。上年12月因為減價好抵就狂買，到最後咪又係用唔晒。其實護膚品我而家真係買少咗好多，因為我已經用好多basic 嘢。而且我已轉用一d平價小小，但功能好好嘅產品。我都係係iherb 度購買架，下次再同大家介紹下。根本就唔需要搽太多野上塊面度，好多都係因為廣告手法叫你買之嘛。

所以買野前會諗呢個想買<想要<有用< 有需要<必須要

以下係節錄朋友的whatsapp 真實對話:

我曾經聽過一個幾好的嘅慳錢計：

當你好想好想買嗰件野，無論係衫褲鞋襪.. 飲料..甜品.. 但嗰樣其實係無「必要」，你嗰刻停左哩個慾望後.. Mark down how much.. 每日睇返原來慳左唔少..

例如.. Lemon tea 轉左水.. $10👉🏻5，慳左$5.

件dress 減價勁抵好靚$299. 但只係著一次.. 最後忍住無買.. $299..

求期一日都慳唔少

Mark 低自己減用左幾多錢.. 見到真係好似賺左.. 可能夠去歐洲😂😂

🤔 聽完之後我努力即時回帶諗下呢個禮拜我慳咗幾多錢。同大家分享下大約慳左幾多錢啦:
17/7 路經Zara試咗一對減價鞋$139同埋一件上身$199，試完之後諗咗一陣覺得又要再斷割離，所以決定唔買

18/7 路過見到有些新指甲油嘅顏色$68 x 2，但係發現同自己買開嘅顏色都係差唔多姐，又放低咗。

19/7 買早餐時，俾錢嘅櫃台剛好有凍飲好順手就想俾$15。係一秒之間諗到不如返公司飲水好過啦就放低咗

20/7 放工路過港鐵站，行過曲奇餅店突然間想食一嚿朱古力曲奇，又唔係肚餓忍一忍口慳$15

21/7 無咩印象用多餘$

22/7 呢日去書展，見到好多書同文具真係好想買。但係又為咗唔想太多野，所以只係選擇最想買嘅。無特別計算因為放棄咗想買嘅念頭而慳左幾多。因為實在放底左好多無買。如果只計我其中一兩盒好想買來做手工嘅用具無買到嘅話慳咗$240同埋$159啦。因為我知道呢兩盒野最終都係買黎擺，無時間做。

23/7 係食快餐店食午餐，飲楊枝甘露嘅話要$16，飲普通嘢飲加$12，清水免費，最後決定要清水一杯。我當慳$12

總結慳咗大約$915 咁多錢呀。

呢啲就係平時嘥左嘅婆仔數啦。仲有好多其他方法慳錢，下次講下用咩美容產品而又可以達到一樣嘅護功效吖。

Love ❤️ 減少買，省省錢

Published on 22 七月, 201623 七月, 2016 由SweetheartGal撰寫

最近和朋友一起努力實行斷割離。我們發現最容易割離的，就是衣服。因為潮流每季都在變，如果真的跟著潮流走，恐怕買再多的衣服也不夠吧。
我們都曾經是時裝設計師，買衫買辦的機會自然特別多，未到新一季就堆滿一櫃，家裡總是有驚人的儲存量。(並不是說設計師都很會買，只是多逛街，多出事😅 )但買得再多，還是覺得不夠，總認為多一件就能更好配搭。沒有穿着過的多的是。最近收拾衣櫃的時候，才發覺幾年前買下的衣服的價錢吊牌還在。
談到我們現在的穿著風格，原來已不知不覺回歸基本款式，常穿的是容易配搭出門的。再配戴一兩件精緻的飾物已經很足夠了。黑白灰是我們現在經常穿的，當然少不了我最喜歡的裸粉色系和藍色。以前的衣服，那些又釘珠又綉花"誇啦啦"的 fancy 款已沒有在穿了。不是因為太誇張，而是當你真正要穿著工作的時候就只會穿最基本的，只要small details 就夠了。另外，現在追求多一點的品質的享受，會選那些質量比較好的衣服，少買那些便宜和只著重款式而不是很耐穿的衣服 (往往穿幾次便不會再穿的fast fashion 如h&m , uniquo, topshop etc) 。因為貴的衣服你一定會很珍惜小心翼翼在穿著，而便宜貨因為太容易得到了，你會有那麼珍惜嗎？

試想一下，假設一件$100 的衣服只穿3次，成本是$33.3 ，如果上下身衣服同價，一日的外出服裝費便是$66.6 (不計內衣及其他)，一個月花在服裝的費用就是$1998了。一年豈不是$23,976? 足夠去一次豪華遊了。真係小數怕長計。
自從我決定減少買物之後，省下一大筆錢呢。這真是一個好處。所以減少購買慾，少瀏覽消費網頁吧。反正你也許只是在享受購物過程。

這是我幾年前的作品，片中可見到我大約100件的衣服，想表達fast fashion 與我的關係。穿在身上的只是來去衝衝瞬間即逝的東西，也許沒有人會記得並且會遺忘。

http://youtu.be/zb7HO5QdhS8

Majolica Majorca X 宇野亞喜良特別企劃

Published on 20 七月, 2016 由SweetheartGal撰寫

近日資生堂旗下品牌Majolica Majorca 戀愛魔鏡聯同日本知名插畫家宇野亞喜良的特別企劃。
有興趣可以到以下的 website ：

https://mj-gift.shiseido.co.jp/
宇野亞喜良生於1932年，是日本繪畫藝術家，插畫家和畫家。他的作品特點是夢幻般的視覺效果，大膽和感性的線條流動，華麗的（偶爾怪誕）色情，和頻繁使用拼貼和鮮豔的色彩。

圖片轉載自網絡

透過宇野亞喜良的畫作，可以讓你試試變成宇野亞喜良筆下的人物，以顏繪畫出你的樣貌，還可以用戀愛魔鏡一系列的化妝品為你的拼圖上色。

首先輸入你個名(只限英文和數字)

選擇拼圖，還是上傳你的照片形成你的虛擬人物容貌。

然後再根據你的喜好，為你的虛擬人物上妝換上你喜歡的眼耳口鼻髮型同顏色，還可以調整位置。

完成基本插圖之後，接著來到化妝上色部位，基本上已有幾個固定的妝容預先準備好，你只要從裡面選就可以了。如果想有少許變化，就要轉去下一頁再微調了。

還可加入不同飾品。

完成就可以儲存這個圖案成為你的頭像喔。

除了單人，還可以加入你的朋友兩個人也可以。

Have Fun❤️

整理

Published on 5 七月, 20165 七月, 2016 由SweetheartGal撰寫

最近終於肯面對自己一直以來買買買的壞習慣，整理那些陳年堆積起來的雜物。女人天生就是喜歡買買買，開心又買，傷心又買，總是滿滿藉口。到有一日終於發現自己的家每一個角落都放滿東西才覺得事態嚴重。你問我到底受了甚麼刺激才肯去改變？是因為" 斷捨離流"這本書，令我反思自己那個不受控制的行為。我不缺甚麼，但每每走到商店時，總覺得自己缺了甚麼，甚至囤積一大堆永遠用不完的日用品。一堆堆的物品，看似整齊存放，放在最下面的卻又永遠不會碰到，又令到我常常找不到想找的東西，那又何必呢？大概你也和我一樣，衣櫥裡面的衣服一層層疊起，永遠只會穿最上層的嗎？

在下定決心之後，我把房間好好整理一下，舊的衣服，那些已有兩年未穿過的，差不多款式的就不要了。買了又覺得不合用的化妝品，過多的護膚保養品，雜物書籍，甚至大學時期的筆記影印本，參加展覽會的場刋，各種雜物，我隨便收拾整理一下已清除了十幾袋垃圾了。當中又分為可捐出的/送給人的/二手巿場的/可回收的/ 真正的垃圾。你也試一試吧，即時覺得自己的空間大了。

如果想捐贈，最近就有舊書捐贈了

http://www.worldvision.org.hk/usedbook?utm_source=facebook&utm_medium=post&utm_campaign=Usedbook_2016&utm_content=mainvisual_facebook_20160704

而二手市場就可以試下

Carousell 呢個apps 吖

🌸甜美100% up🌸 MoYou 指甲壓花板

Published on 4 四月, 20164 四月, 2016 由SweetheartGal撰寫

真係唔好無事出街，尋日路過朗豪坊又跌錢了，都係好奇累事 😂

起初行過見到呢個pop up store，我以為係賣iPhone case，但點解會花碌碌嘅？見到咁七彩咪走過去八吓囉，咁就出事了。原來呢個係來自英國的品牌，專賣指甲移印壓花板，一直都知英國玩指甲花好得。難得遇到仲有成500款咁多，真係心心眼。男友見我睇得咁開心，不斷問我呢d係咩，又係咁叫我試。我地玩左陣，佢覺得好神奇，仲試埋一份。