標籤: skincare

Sweet教室❤️ 點睇成分表

Published on 由SweetheartGal撰寫

好多朋友以為我好叻，點解會識得睇咁多成分。其實我一d都唔叻架，只係做左好多功課。咁多化學成分，又點會記得到咁多啦。我都係靠查字典同上網架咋。不過，係街買野果時又好難企係人地間店度上網check架嘛。有個幾個tips俾大家，
1) SLS 即係 Sodium Lauryl Sulphate、Sodium Laurylsulphate、Sodium Lauryl Sulfate、學名稱為Sodium dodecyl sulfate (SDS)等。簡單黎講如果成分有sodium 乜乜乜我一定放低，因為sodium 嘅化學反應好大，(你睇下加左水同Sodium 嘅反應)  

 即係話刺激性比較高，長期且高濃度接觸，就會導致破壞肌膚角質層，造成皮膚容易吸收其他致癌成分，並滲入各種促進癌症的成分可能性。
2) PEG- 成分(聚二乙醇Polyethylene glycol)，其他寫法有結尾有-xynol、-ceteareth、-pleth。通常用數字作為不同類型的區分，例如：PEG-4、PEG-100…。數字愈細，代表化學成分愈容易被皮膚吸收。

根據國際毒物學期刊（International Journal of Toxicology）的化妝品成分審查報告，發現PEG含有好多污染物，包括1,4-二氧陸圜(1,4-dioxane)已知的致癌物質、多環芳香族化合物，重金屬鉛、鐵、鈷、鎳、鎘、砷…等。已經被證實會降低血壓，成分不容易被分解、容易累積在肝臟中。所以有PEG就最好放低啦，都係少用為妙！
3) Paraben (苯甲酸酯類): 有致癌風險，目前已被歐盟禁用。成日用作化妝品的防腐劑。標示可能會寫成methyl-、ethyl-、propyl-、 butyl-、itobutyl- 等字樣。

4) 同成分後面有個數字跟住的就係人造化學物
5) 除左幾個比較簡單的，我仲下戴左兩個好方便的apps，Think dirty 同CosScan可以即時scan barcode 同成份表等你知成分安唔安全。不過兩個都係外國apps，所以我地用間的日韓牌子可能search 唔到。

   
 
要list哂就真係太多啦，記住呢幾個已經夠用了。

甜姐兒教室 : DIY 卸妝油

Published on 由SweetheartGal撰寫

大家一定等左好耐，因為之前一直未有時間拍好條片，趁今個假期我終於攪掂左啦。不過我好驚條片悶親大家，所以我用左快鏡之餘仲講得好快。如果有missing 嘅地方，我就係度補充啦。

“植物油潔面的好處係可以同時間清潔和滋潤肌膚，試過你就會愛上的” ﹣ SGal 

要整卸妝油，有以下幾種植物油可以選，睇你自己鍾意同效果：

  • 蓖麻油Castor oil ﹣ 主要用作基底油，有潤濕作用，係理想的潤滑油。但佢既密度、粘度比一般油高，不且獨自使用。
  • 荷荷芭Jojoba oil ﹣ 滲透性高，可加快皮膚吸收。仲會係皮膚表面形成保護膜。不過不D結身，無甜杏仁油同葡萄籽油咁易推。但穩定性高（因為有維E），可以keep好耐DD。佢有個好處係會溶係溫水，洗完臉都唔怕整到洗臉盆油淋淋喔
  • 甜杏仁油Sweet almond oil ﹣易吸收，質地清爽唔油膩。能夠滋潤同軟化膚質。適合乾燥、敏感、暗瘡膚質都okay 架。
  • 葡萄籽油Grapeseed oil﹣ 非常之容易吸引，而且唔油膩，好易推開。最緊要係有抗氧化，同美白淡班既功效。唔想mix單獨用都得架

精油同維他命E油係 Optional， 你鍾意都可以加埋架：

  • 天竺葵
  • 橙花
  • 乳香
  • 薰衣草
  • 維他命E油﹣抗氧化，仲可以令支油可以keep耐D


當然唔少得d靚靚玻璃瓶啦。好處係可以不斷recycle ，又可高溫消毒。我之前試過recycle 舊膠樽，點知一加熱水就溶左lu.

我就用左4種油mix，呢個我自己用左好幾次唔同油嘅分量而研究出黎，同你地一般見到嘅可能有d唔同。我覺得只係用黎當卸妝油有d浪費，所以我卸妝時我俾d油留係面上耐d，卸妝兼護膚。（可以睇返我之前的post 我的護膚時間表）

我屬於混合性皮膚，製作用油嘅比例為1:4。即1份castor oil 配4份植物油。唔明？簡單d講，例如1份castor oil 係10ml，其他嘅油就放40ml。而精油係optional，如果你要加又要計數啦。

例如: 100ml 卸妝油要滴幾多精油呢？ 每100ml 就要有1%的精油， 我地就將100ml x 1%=1ml，以每滴精油為0.05ml ，再用1ml 除0.05ml=20。即係話每100ml要有20滴精油啦。因為靚嘅精油好貴，而且只係卸妝用，你覺得無所謂唔落都得架。

其實要用咩油好睇你個人喜好同膚質。唔知你係咩膚質呢？可以參考下面的formula:

乾性皮膚 1:9

  • 1 份 Castor oil
  • 9份其他植物油， 建議用
    • 荷荷芭油，或
    • 甜杏仁油

可以加

  • 橙花
  • 乳香

中性皮膚 1:2

  • 1 份 Castor oil
  • 2份其他植物油，建議用
    • 荷荷芭油，或
    • 甜杏仁油

可以加

  • 橙花

油性皮膚 1:2

  • 1 份 Castor oil
  • 2份其他植物油， 建議用
    • 葡萄籽油，或
    • 甜杏仁油

可以加

  • 橙花
  • 天竺葵

混合性皮膚 1:4

  • 1 份 Castor oil
  • 4份其他植物油

可以加

  • 橙花
  • 薰衣草

💖SweetheartGal 特製卸妝油配方 （混合性皮膚）:

  • 30ml 蓖麻油
  • 60ml 葡萄籽油
  • 30ml 甜杏仁油
  • 30ml 荷荷芭油
  • 12-3 滴 甜橙
  • 12 -3滴 薰衣草
  • 幾滴 維他命E油

(應該要跟算式一樣30滴精油，不過我覺得太多所以自己減左幾滴，而且最尾果幾滴有時比較難控制，好易滴多左。大概去到第12滴時我就會收手)

img_9261

♥ 記得mark低邊日整同成分呀，要注意過期日喔 。由於天然物料不能保存太久，除非放左好多維他命E油，唔係最好一至二個月內使用完畢喔♥

♦ 請注意：孕婦忌服蓖麻油

大家可以參考我之前拍的短片：

噴住保濕

Published on 由SweetheartGal撰寫發表留言

近日天氣好乾燥，係咪每次上完粉就覺得好似好乾要甩皮咁呢？我上兩個月去首爾旅行時，跟當地化妝師偷師學左個招勁野。因為當地唔似香港咁潮濕，天氣乾好多(我去旅行果幾日可以成日都唔溶妝，真係勁開心💕) 
呢招咁勁係咩呢？就係水潤底妝保濕法🎀你地都知道韓妹最愛水嫩妝架啦，望落好水潤好有光澤那種。其實方法超簡單，只係多一個step! 只需喺搽粉底之前同之後噴上保濕噴霧，就已經得啦。唔明？跟著以下的 steps 啦😉

  1. 護膚 Skincare : toner, eye cream , face cream
  2. 防曬 Sunscreen
  3. 隔離霜 Primer
  4. 保濕噴霧 Spray (注意要距離20cm噴向面，唔好太近呀)
  5. 粉底 Foundation
  6. 碎粉 Loose powder
  7. 保濕噴霧 Spray

都唔記得就用 “SC + S " skincare + spray 呢個字記住啦💖

我的護膚時間表

Published on 由SweetheartGal撰寫發表留言

之前講過我有一個beauty schedule。因為我份人太無記性啦，所以我最好就跟時間表做。只要記住今日係星期幾就一定記得自己要做咩了。
自從我用左天然產品之後，護膚方法都簡化左好多。你地有無發現到我無用精華素嗎？其實我已經用植物油代替左啦，而且我而家唔再覺得係必需了，因為精華液只不過比較水潤容易吸收，實際功能同一般cream 差不多架咋。
之前都講過我會diy卸妝油，因為係天然植物油同時加入精油做，所以除咗有卸妝功能之外，仲可以用來護膚添啊。
咁我會o係沖涼前搽滿全面用來卸妝，同時等d油深入毛孔清潔。咁我就唔會即時就沖走咗d油，我會先去沖涼洗頭，等沖涼時d蒸氣打開d毛孔，而且我要確保洗面嘅時候，已經洗完頭，唔會再有洗頭水流向面度，要確保乾淨嘅。記得用溫水洗油先溶到架。之後我就用洗面皀用凍水洗面。
代號:

  • Trio – 眼霜+ 化妝水 + 面霜 (分早/晚)
  • S – sunblock 防曬
  • P – primer 底妝
  • F – foundation
  • L – loose powder
  • Oil only – 係指摩洛哥堅果油

我嘅護膚schedule 如下表，次序已分:

 係咪好簡單呢？

為何開始我的天然護膚品？

Published on 由SweetheartGal撰寫發表留言

http://youtu.be/Emwe2-Lms0s

我用天然護膚品大概已經有一年啦。你問我點解會開始用？由於上一年出現人生第一次皮膚敏感。真係講都唔信，我發現我皮膚嘅至敏原因係原木材料。敏感嘅野，真係唔係咁啱接觸到都唔會知。如果唔係我做原木雕塑作品，可能我一世都唔知我對原木材料敏感。果時真係痕到爆炸，我個身出左好多紅色一塊二塊嘅野好似濕疹咁。又睇醫生又食藥又搽藥膏，用左大約半年先好返。所以我朋友就建議我不如轉用天然護膚產品，減少d刺激等我快d好返。
有機嘅天然香草自然療法，用d易明嘅説法，我會話好似中藥咁。不過，如果直接用中式嘅講法，難免你會覺得自己有d婆仔，所以會用比較西方d嘅講法, 如有機/天然/植物療法等字樣。

不過始終係天然嘅產品，自然有點草藥味。而我最鍾意用嘅摩洛哥堅果油，陣味就最大啊。


如果身邊有對氣味特別敏感的人，最尷尬嘅多數都係當男朋友貼近你時，突然話你有婆仔味囉。特別係搽左天然油係身上果陣，d衫有機會沾到d油，吸得多，久而久之有d油益味。所以我盡量會喺沖涼前搽油，等自己個身吸咗啲油先沖涼，而唔係沖完涼先搽。咁我d衫就唔會吸到d油啦。同埋，天然產品無防腐劑，如果係自己Diy的就最好1-2個月內好用完或掉左傳啦。

肌膚: 俾我抖抖啦！

Published on 由SweetheartGal撰寫發表留言

皮膚保養過度反而有機會變差，呢d叫做虛不受保。情況就好似你食得太飽飽得滯作嘔咁，咩都唔想吸收啦。

所以我每個星期都會有連續兩晚俾佢抖抖，只係會好簡單咁，用天然卸妝油卸妝等d油可以深入低層去除油脂，5鐘後用浸過暖水嘅毛巾印走，之後再用天然洗面皂輕輕咁洗走面層嘅油脂。咁就已經洗得好乾淨啦。

然後呢，就只係會搽摩洛哥堅果油，過15分鐘吸收囇唔笠果陣就可以瞓架啦。就係咁簡單💕想偷懶嘅，而家係咪好開心呢？


你會慢慢發現自己嘅素顏都可以見得吓人吖。上圖只係有基本skincare 同護唇膏
因為我個人比較無記性，我連自己幾時食藥都會唔記得時間，所以我就為自己定下左一個皮膚保養時間表，跟著個timetable 就一定唔會唔記得啦！而且仲可以慢慢變成習慣。

✨各位有興趣不妨試下✨

我的防曬make up base之選

Published on 由SweetheartGal撰寫發表留言

之前講咗咁多點樣分辨SPF同埋PA嘅數值，咁今次就同大家講下我最近用過嘅防曬產品。(我自己比較鍾意清爽無油光的產品。)

由於我本身係中性嘅皮膚只係T字位喺下午先出比較多油，以下嘅選擇比較適合中性皮膚參考，因為唔同嘅皮膚有唔同嘅需要要注意哦。之後我會每一個牌子寫一篇文章，同大家分析佢地嘅成分，再根據唔同皮膚嘅需要比d意見。

先唔理佢嘅成分，只係用舒適度，持久性，方便，遮瑕，保濕，易推，美白，調色，油光，價錢做評分。

Clarins UV plus hp SPF 40, PA+++

上圖由上至下左至右排好No.1 -No.6，就係我的選擇次序，有♥的最係我的最愛CDP

以下就列出我最喜愛嘅各項Number One♥ 由我的Last choice 講起。

 

調色/ 包裝No.1
Chanel Le Blanc Light Revealing Whitening Makeup Base #10 Rosee, SPF 35, PA+++ HKD 410

感覺比較厚身，似似地foundation，可能想你一支就攪掂。一如所有Chanel的skincare, 佢一樣帶有一種清新花香，淡淡嘅花香味令你覺得好舒服同優雅。好容易推開，基本上都係為左令你好水潤，但感覺有D油膩，遮瑕力只係比foundation次一級，調色效果不錯，#10號有一種好淺嘅玫瑰花粉色，有美白效果。這個系列一共有4種不同的顏色，要睇你想點修飾膚色再選擇吧:

  • #10 ROSÉE（粉紅）：消除晦暗膚色，提升光澤度。
  • #20 MIMOSA（淺黃）：改善不均勻的暗沉膚色，可搽係眼下修飾黑眼圈。
  • #30 LYS（透白）：有無瑕珍珠光澤的明亮膚色。
  • #40 Liac （淺紫）：修飾暗黃膚色，改善肌膚透明度，適合臉部顯得暗沉者或蠟黃膚色。

不過就覺得佢嘅質地唔係好好，好似有層野浮係皮膚上面，十分鐘後都吸收唔到落去。而且之後上碎粉感覺好浮面，又似加左一層野咁。雖然佢話控油，但我過左2﹣3個鐘後已經滿面油光，感覺唔夠滋潤欠缺水分。

包裝無得輸，孖C一出，無人可抗拒。雖然我係Chanel忠實fans，但呢個不會是我的選擇，我覺得年輕皮膚質素仲好好的美女OL都仲可以試試，因為調色效果真係唔錯，好方便。

最平No.1
Kiss Me: Heraine Beauty Perfect Water Sunscreen (SPF50, PA+++), HKD 69
呢個都係比較平的開架選擇。同Sofina一樣厚身D。堅係似搽緊太陽油咁，但又感覺有啲似透明嘅粉底，有微微嘅調色嘅效果， 咪又係令你睇落去白D。所謂一白遮三醜，明哂。但我去短線旅行會用佢，因為唔見左都唔會傷心，勝在夠平。而且防哂時間夠長，去旅行當然都唔想令盒粉底行行下街要補妝。好彩暫時去旅行仲未去過比香港更潮濕的地方。

舒適度/ 保濕度 No.1:
Clarins UV plus hp SPF 40, PA+++, HKD 370

比較多水份，感覺好有水潤感。可以見到D Liquid流來流去。色澤透明且無遮瑕作用! 頭五分鐘之內，仲會見到隻手好似好有油光，等6鐘左右就完全吸收變得乾爽有裸妝感，面部好似上左層薄霧的啞色，控油效果都不錯。防曬功夫做得幾好。

遮瑕/控油No.1
Sofina Primavista Ange，SPF25,PA++,  TWD 350 (只在台灣發售，有朋友去開台灣不妨買支，大約HKD 90,好抵用😍)

勝在夠平少少。比較厚身，你會見到佢好有黏力。因為比較厚身嘅關係，美白能力同遮瑕都做得唔錯。一陣就已吸收哂，無油光又爽身，比較粉身搽上面後會變成粉狀， 有少少嘅粉紅色可調整膚色令你望落白左。如果本身皮膚條件唔錯，可以直接上粉餅&碎粉，唔駛用liquid foundation 都得。控油效果幾好，可以keep到一日，係平價之選，而且各方面表現平均。我已經用左兩支啦。

滋潤肌膚/ 防曬No.1
Sulwhasoo hydro-aid moisturizing lifting UV, SPF 50, PA+++, HKD 390 ( 韓國買會平好多哦)

雪花秀嘅防曬，感覺就好似搽緊面霜一樣，基本上唔會好似上文嗰幾隻咁，會好水咁流落去，反而會停咗你個手到好似cream 咁靜止。正如頭先所講，佢感覺好似面霜一般樣，所以搽咗之後你會覺得好潤，同好有光澤 （可能韓國美女都鍾意珠光效果吧）。雖然過咗五分鐘之後你塊面都仲係令笠笠，但你會感覺到吸收左。透明無色並無調色效果， 仲有好大陣中藥味。

♥美白/修毛孔No.1♥
Cle De Peau Voile blanc brightening Enhancer base, SPF 35, PA++ HKD 550 (最近韓won大跌，係樂天市場買居然係最平USD 58, 大約HKD370 @Nov2015 rate)

Shisedo其下之一，係人都知Shisedo嘅防曬好出名，一直都非常出色。呢個更加係係其下貴婦line，雖然係我嘅最愛但太貴了(我已用左3支)，所以我一直想塭吓一啲平價嘅代替品。暫時用Sofina代替。

無論係美白，調色，保濕各方面都表現得非常之好。佢好似一粒珍珠嘅顏色，搽上面之後好快就吸收完變成粉狀。但同時有一啲珠光嘅立體感。我好多時趕時間都係直接用完就加粉餅出門。

不過呢D都係未睇成分而單純以感覺行先的分析，下次我地再深入討論一下成分，可能選擇又會變了。

♦ 暫時寫住咁多先，有新產品會不斷更新 ♦

 

暫時寫住咁多，會不斷更新

SPF防曬你要知

Published on 由SweetheartGal撰寫發表留言

 用得防曬產品當然係為咗保護皮膚唔好俾太陽曬傷啦。所以我哋揀防曬產品嘅時候，唔能夠只將重點放左係防曬嘅效果上，要同時考慮到產品對皮膚嘅安全性，甚至護膚性。咁買防曬產品嘅時候，當然要睇下嗰個SPF (Sun Protection Factor)數值啦, 呢個數值嘅大小，就係為咗話比你知，你可以係太陽下曬幾耐就會比紫外線B曬傷 （防曬嘅參考即係嗰個UVB值） 而PA (Protection Grade of UVA) 呢，就係指防止曬黑，阻隔紫外線損害彈性纖維，造成皮膚老化。

簡單黎講，即係

  • UVB 等於延長皮膚曬傷時間， e.g. SPF25，即係你可以見光嘅時間，由10分鐘就會出現曬傷（皮膚開始紅紅地），延長至250分鐘後先會出現 。
  • UVA等於防護紫外線功能，e.g PA+，PA＋＋，PA＋＋＋， 愈多加號即係防曬效能愈高

可參考台大醫院皮膚部

其實呢兩個係最基本嘅參考數值，因為有D產品雖然已經有SPF50,PA+++,但防曬能力都係一般架咋。如果要認真研究，就要留意產品真正防曬能力嘅強弱性。

其實呢直接將防曬擦係皮膚上面，當中嘅成分有機會過度刺激而出現皮膚過敏現象。因為一般高防曬嘅產品，會有化學性嘅紫外線吸收劑，如氨基苯甲酸衍生物（p-aminobenzoic acid,PABA)、二苯酮類化合物 (Benzophenones)、樟腦衍生物(Camphot derivatives)、甲烷衍生物等。大部份都係脂溶性而且穩定性較差，對皮膚有一定的刺激性，可能引起炎症、過敏等。所以每一種嘅防曬成分都會添加上安全量限制，超過左呢就會對皮膚有唔好嘅影響啦！如果見到有以上嘅紫外線吸收劑嘅成分就要注意下啦。

比較好嘅防UVB成分：鄰氨基苯甲酸酯衍生物 (Anthranilate)、肉桂酸酯類（Cinnamate） 、水楊酸酯類(Salicylates)、二氧化鈦(titanium dioxide )等都係水溶性。

要防UVA，以下係比較好嘅成分， 留意下有無就知有無效 ：

  • 二甲基胺基苯甲酸鹽 （Padimate）
  • 氧化鋅 （Zinc oxide）

但係如果有以下嘅成分就要小心唔好繼續用啦：

  • 丁基甲氧基二苯甲酰基甲烷 （Avobenzone）
  • 二苯加酮﹣3 （Benzophenone﹣3）
  • 乳酸薄荷酯 （Methyl anthranilate）
  • Oxybenzone

但係唔好以為用全植物性嘅防曬成分就會好D，因為效果無化學性嘅紫外線吸收劑發揮得咁好。

想要保持皮膚白滑，咁就要注意平日嘅防曬功夫啦。 唔係淨係出街見到太陽時先做防曬，要知道燈光都有紫外線，室內都要注意，特別係射燈。夜晚洗完面之後就唔好用含有防曬成分嘅產品啦。晚上係應該俾皮膚抖抖，唔好再俾D咩刺激佢啦。

下次再同大家講下我試用過嘅防曬產品。

 

保鮮要趁早

Published on 由SweetheartGal撰寫發表留言

Photo 18-11-2015, 13 46 54 copy.jpg

有人話保鮮期要趁早，你都唔會係食物差唔多變壞嘅時候，先至用保鮮紙包好放雪櫃啦。要保鮮梗係趁新鮮嘅時候去做。

所以人哋話三歲定八十，真係一啲都無錯。記憶中，我自幼稚園時已成日偷媽咪房間嘅護膚品用，最鍾意就係搽勻全身令自己香噴噴。

我人生第一件化妝品係一盒海藍色眼影(我都唔記得咗點解唔買粉紅色。可能果嗰年代比較興啦。) 。當時嘅我應該讀緊中二，某日同媽咪行化妝品店，我大膽問佢可唔可以買比我，我記得好似係買咗港幣$28。到而家我仲keep住，唔捨得掉。(而家真係放左係度好多年了)

不過一直到到大學時期之前我都係無用啲咩護膚品，最多都係用Johnson baby, 直到我17歲時認識左人生中我No.1 嘅美顏伯樂，佢係我嘅好朋友亦都係我嘅大學housemate (而家係專業化妝師）, 佢教識咗我保鮮要趁早嘅道理，仲時不時提醒我要飲多d水，食多d生果蔬菜(佢仲好到整埋叫我食)。 除咗咁佢仲教我化妝嘅重要，咁當然唔係化濃妝啦。一個小小嘅淡妝，已經可以令人睇落精神好多。佢話最緊要係眉毛同眼睫毛。所以我真正開始化妝係由眼妝開始。自己去買第一樣嘅就係Lancôme既睫毛液。雖然而家睇返當時嘅化妝功力，真係有啲慘不忍睹。不過呢個都一個學習嘅過程吖。

Photo 18-11-2015, 14 32 20 copy.jpg

而真真正正認真去做皮膚保養嘅時間，應該係開始出黎做野21/22歲左右，開始注意用啲咩護膚品，譬如話toner/lotion/eyecream/防曬。不過當時嘅皮膚狀態仲係好好，所以基本嘅skincare已經足夠，之後都係拍啲碎粉就出街。我連foundation 都無用呢。

隨着年紀增長，我嘅skincare用品就越來越多，已經唔會好似以前咁隨便搽幾樣嘢，而係多到要擦成8樣嘢後(first care/toner/eye cream/ serum / lotion/ 防曬/ make up base/prima) 先可以上妝。

Photo 20-12-2010, 09 39 51 copy.jpg

到最近我又開始懷疑，其實係咪真係需要搽咁多樣嘅護膚品呢？可唔可以簡單啲？

美係由內而外。所以我依家開始學習養生之道，係護膚產品上面花啲心機，研究下佢哋嘅成品。希望可以簡單啲，嘗試用天然材料幫助/保持靚靚嘅皮膚。